Fréttir Í HÚSI AFA MÍNS 12. nóvember 2008 Sögusviðið er Reykjavík eftirstríðsáranna og ótalmargt sem skýtur litlum dreng skelk í bringu; þrýstiloftsflugvélar fljúga um loftin með ægilegum hvin, hermenn spásséra um einkennisklæddir og hertrukkar á götunum. Ekki er langt síðan hræðileg sprengja var sprengd í Japan og orðið Hírósíma stimplar sig inn í hugann. Sem betur fer eru stríðin í heiminum þó handan fjarskans og raunveruleg áhyggjuefni stráka í Reykjavík öll heldur smærri í sniðum. Má þar nefna kerlingar á Njálsgötunni sem bíða færis bakvið gardínur að ausa skömmum yfir krakka og ketti, ljósameðferð í Austurbæjarskólanum – þeirra nemenda vel að merkja sem þykja full væskilslegir á að líta – og svo óttann við garnaflækjuna. En hún getur hlotist af því að kyngja hinu alræmda péká-tyggjói eða þá sveskjusteinum. Sögumaður virðist í fyllingu tímans hafa sigrast á ótta sínum, hrakið skelkinn burt úr bringunni, en hann er hinn góðkunni útvarps- og fréttamaður Finnbogi Hermannsson. Stíllinn ætti að koma kunnuglega fyrir sjónir þeim sem hafa hlustað á pistla Finnboga gegnum tíðina, góðlátleg kímnin á sínum stað og tekur oftar en ekki völdin í textanum. Hversdagslegustu athafnir lifna við og öðlast merkingu fyrir galdur tungumálsins. Bókin er 182 bls. Leiðbeinandi verð er 4.680 PANTA BÓK Til baka