Fréttir RAUÐBRYSTINGUR: „Þetta er bókin í fríið!“ 3. apríl 2009 LENÍNGRAD 1944: Í skotgröfunum fyrir utan borgina berjast fjórir norskir sjálfboðaliðar í þýska hernum fyrir lífi sínu; kuldinn, hungrið, rússnesku leyniskytturnar – dauðinn situr fyrir þeim við hvert fótmál. OSLÓ 1999: Eftir óhapp við skyldustörf er Harry Hole sestur bakvið skrifborð í öryggisþjónustunni með bunka af skýrslum til yfirlestrar. Hann staldrar við tilkynningu þess efnis að úti í skógi hafi fundist tóm skothylki úr stóreflis þýskum veiðiriffli af sjaldgæfri gerð. Á sama tíma er fyrrum hermaður af austurvígstöðvnum myrtur í húsasundi bakvið veitingastað sem nýnasistar sækja. Tilviljun? Harry Hole trúir ekki á tilviljanir. JO NESBØ er norskur hagfræðingur, rokktónlistarmaður og metsölurithöfundur. Bækur hans um rannsóknarlögreglumanninn Harry Hole hafa farið sigurför um heiminn og koma nú út í vel á fjórða tug landa. RAUÐBRYSTINGUR er sú fyrsta sem þýdd er á íslensku. Bókin hlaut norsku bóksalaverðlaunin árið 2000 og hefur jafnframt verið kosin besta innlenda glæpasaga allra tíma af lesendum í Noregi. Ensk þýðing hennar hlaut tilnefningu til Duncan Lawrie-rýtingsins árið 2007, en það eru verðlaun sem árlega eru veitt þýddri glæpasögu sem kemur út í enskumælandi landi. Á árinu 2008 stofnaði Nesbø Harry Hole-sjóðinn sem helgaður er baráttunni gegn ólæsi barna í heiminum. Bjarni Gunnarsson þýddi. Til baka