Fréttir HJÁ BRÚNNI - ný skáldsaga eftir Kristínu Ómarsdóttur 21. nóvember 2009 María er ballerína sem býr í ónefndri borg. Á kvöldin stígur hún á svið og dansar fyrir listþyrsta áhorfendur í einu af leikhúsum bæjarins en á daginn sinnir hún hversdagslegri verkefnum; þrífur hótelherbergi oggætir barnshafandi prinsessu sem lokuð er inni í lítilli íbúð eftir að barnsfaðir hennar, sem er skáld og bróðir leikhússtjórafrúarinnar, hefur yfirgefið hana í sárum raunum. Við sögu kemur fjöldi persóna úr nútíð og fortíð borgarinnar; listamenn, almúgi og valdsmenn. Í fyrstu virðist allt í föstum skorðum en það er einskær blekk­ing; undir stilltu yfirborði kraumar og vellur og fyrr en varir sýður uppúr með ófyrirséðum afleiðingum. Kristín Ómarsdóttir sýnir enn og sannar með þessari bók að rödd hennar á sér enga hliðstæðu í íslenskum bókmenntum. Hjá brúnni einkennist af makalausu ímyndunarafli og einstakri hugmyndaauðgi, nístandi gálgahúmor, grallara- og prakkaraskap, skáldlegri myndvísi og ljóðrænni fegurð sem þó er borin fram með ögrandi tungutaki.Sagan er í senn fyndin og gáskafull, spennandi og ógnþrungin. Veisla fyrir öll skilningarvit. Kristín Ómarsdóttir hefur sent frá sér fjölda skáldsagna, smásagna, ljóðabóka og leikrita sem vakið hafa verðskuldaða athygli heima og erlendis og hlotið eftirsótt verðlaun. Hjá brúnni er enn ein rós í hnappagat þessa einstaka höfundar. Til baka