Fréttir

Ný bók væntanleg eftir Camillu Läckberg 26. ágúst 2009 Upp úr miðjum september nk. kemur út önnur bók Camillu Läckberg á árinu. Það er Ástandsbarnið (Tyskungen) sem er fimmta bók Camillu á íslensku. Um bókina segir á kápu: Hvers vegna skyldi móðir Ericu Falck hafa varðveitt gamla nasistaorðu? Spurningin lætur Ericu ekki í friði og hún hefur uppi á sögukennara á eftirlaunum til að leita skýringa. Sá bregst hins vegar undarlega við og veitir engin svör. Tveimur dögum síðar er hann látinn. Myrtur. Ericu bregður í brún þegar henni berast fréttir af morðinu. Eftir að hafa tvístigið lengi tekur hún til við að lesa dagbækur móður sinnar og kemst þá að því að á stríðsárunum hafði móðir hennar kynnst hinum myrta. Gæti heimsókn Ericu til hans hafa hrundið af stað atburðarás sem leiddi til morðsins? Hver skyldi vera reiðubúinn að fremja morð til að hindra að sannleikurinn um löngu liðna atburði líti dagsins ljós? Í Ástandsbarninu eru það fjölskylduleyndarmál Ericu Falck sem koma upp á yfirborðið meðan lögreglan í Tanumshede þarf að komast af án Patriks Hedström sem er í feðraorlofi. Gamilla Läckberg fléttar heillandi frásögn af atburðum í lífi ungrar konu á fimmta áratugnum listilega saman við samtímann. „Bók Camillu Läckberg, Ástandsbarnið, er hennar besta til þessa . . . áhugaverð og vel skrifuð frásögn – trúverðug og grípandi. Skemmtilesning eins og hún gerist best.“ Bohuslänningen Camilla Läckberg hefur vakið heimsathygli fyrir glæpasögur sínar og íslenskir lesendur hafa sannarlega tekið bók-um henn-ar fagnandi. Ástandsbarnið er fimmta bók Camillu sem gefin er út á íslensku. Áður eru komnar bækurnar Ísprinsessan, Predikarinn, Steinsmiðurinn og Óheillakrákan. Anna R. Ingólfsdóttir þýddi.

Til baka