Fréttir

Eyþór Árnason hlaut bókmenntaverðlaun Tómasar Guðmundssonar 2009 13. október 2009 Eyþór Árnason hlaut í dag bókmenntaverðlaun Tómasar Guðmundssonar fyrir handrit að ljóðabókina HUNDGÁ ÚR ANNARRI SVEIT. Þetta er fyrsta ljóðabók Eyþórs. Í umsögn dómnefndar segir m.a.: „Í bókinni streymir ljóðmálið fram, sterkt og hugmyndaríkt. Kímnin er aldrei langt undan og alls kyns furður gera vart við sig, eins og þegar rjúpurnar hans Guðmundar í Miðdal sem gerðar eru úr gleri lifna við og láta sig hverfa. Í öðru ljóði leggja skip að bryggju bakvið mánann þar sem skuggalegir menn bíða með skjalatöskur. Og í enn öðru ljóði kemur Clint Eastwood ríðandi yfir Faxaflóann. Það er gnægð af skemmtilegri hugsun og hugmyndum í þessari ljóðabók.“ Bókmenntaverðlaun Tómasar Guðmundssonar eru veitt á hverju ári í minningu Tómasar Guðmundssonar skálds. Verðlaunin voru veitt fyrst árið 1994. Dómnefnd var skipuð Kolbrúnu Bergþórsdóttur, Ingibjörgu Haraldsdóttur og Jóni Óttari Ragnarssyni. Uppheimar óska Eyþóri til hamingju með verðskuldaða viðurkenningu.

Til baka